قصيدة عامية

ملامحك بتفكرني بحاجة جميلة شفتها زمان قبل ما اكون في هذي الدنيا … جايز انا وانتي كنا سوى قبل كل دا؟ …  ما انسى كيف كان شعوري اول مرة شفتك فيها .. شعور وكأني لقيت حاجة مفقودة مني كنتببحث عنها من صغر سني .. من ساعة ما ولدتني امي …حتى وانا با ابوس جسمك بلاحظ معالم .. كل معلم بيتكلم معايا … شفت حبة خال في معلم يبغا دايم هوايا … طليت في نفس المعلم في جسمي لقيت نفس حبة الخال … معقول صدفة؟؟؟ … لا مو صدفة محال … ليه احس لما انفصل عنك اني انفصلت عن حاجة ما اعرف ايش هي .. بس الحياة زي خدك يازينة وردية .. وما يهم  اني اعرف ايش هي .. لأني أنا وانتي وانتي وانا زي الوصية .. متروكين لزمن مو زماننا وبنحارب أسية … بس عارفة حاجة كنت دايماً عارف جواتي اني حا القاكي .. وحتغطى بشعرك وأحنن جفاكي … ليه ياحلوة أوقات اشعر إنك ماتحبيني كفاية؟؟؟ ولما تفيضي عليا بالحب أحس إني ابغا اهرب منك؟ … انا اسف عقدي النفسية بتجعلني اصدك … وانا عارف انه لو بودك  ..تكوني في حضني طوال الدهر .. بس انا والله اخاف عليكي في السر وفي الجهر .. اخاف عليكي مني واخاف عليكي منك .. اخاف تخيبي ظني واخاف اخيب ليكي ظنك .. انا انسان فيالنهاية مو كامل وعندي عيوب … بس إني احب و في عروقي العشق وفنفسي الجوى وفيروحي الهيام … انتي عارفة انو اوقات نومي متلخبط يكون واوقات اكون مرة ما انام … ايوا تتضايقي من عشوائيتي اللي انا اشوفها منظمة .. بس انتي تحبيها لأنك تعرفي أنه انا من دونها مو انا … ايوا انا عارف انه لما اتفلسف ما تفهميني .. وكتير اشياء اعملها ما تعرفيها … بس انا عارف انك رغم جهلك يا عارفة تحبيها .. 
تتذكري اول مرة بستك فيها؟ يشهد علينا ذاك الباب … كان مصر إنه يكون شاهد على أجمل احباب … بس تعرفي حاجة للان مو فاكر ليه بستيني فخدي هداك اليوم رغم انك كنتي اول مرة فيها تشوفيني … هل معقول انك شعرتي بالحب اتجاهي من أول لقا وحبيتي قبل الوداع تذوقيني؟ … ‏انا عارف كبريائك المزيف دايماً حينكر حبك ليا اللي كان من اول لقا .. ومن أول دردشة صوتية … بس الروح ماتكذب ولا المشاعر تكذب ياعزيزتي ال…… … اكيد عرفتي ايش التكملة يا أذكى غبية … انا اسف انا عارف كويس ماتحبي اقلك غبية … ‏بس اعذري لساني اللي على قولتك يباله فلفل .. اعذريه شوية … ابغا اطلبك طلب زي ماتحبي .. طلب بكل حنية .. اسمعي لقلبك واجعليه بوصلتك .. ولا تشركي عقلك عشان لا تفسدي الجمال اللي مايغيب مثلك يانجمة شمال .. احب اقلك في النهاية انو مافي نهاية حبنا وحياتنا دايم بداية…….