بدون عنوان2!

ماكتبت عنوان لاني اكيد ما احتاج .. عنوان لايش وانا ما اعرف هدف من مشاعري؟ .. تدور وكأني كوكب في عالم ناسا .. فصول مختلفة وكأني مدار واتفرج! … بس تعرفي حاجة؟ حتى في كذبي معاكي كنت صادق .. وحتى في صدقي معاكي كنت كذاب .. متناقض ايوا عارف .. بس الاكيد انو لو اتناقض مليون مرة الخلاصة اني حبيتك اكتر من اي احد قيد حب في القرن 21 .. دموعي اكبر دليل على خضوعي .. حروفي هي اخر وصوفي .. الحياة تمشي وانا ماشي معاها الوقت يعدي .. وانا معدي وكلنا معديين وميتين .. اجذب وانجذب .. مارح اكمل كتابة ولا راح اوقف كتابة .. الحياة دون الفن والحروف ماتزيد الا كابة .. وان كنت في دقيقة بدون دين او ملحد او مؤمن .. ضميري يحب! وقلبي يحس ويشوف طول الوقت واكيد هذي رحمة ربي .. مافتكر عاملت احد بسوء وما اتالمت .. مافتكر اني قلت في يوم اني حنتقم الا وانا جواتي سامحت .. ايوا الحياة يحتجلها قسوة وجفوة .. وكلنا نتمنى فيها تجينا من السعادة هفوة .. ممكن اكون سكران ممكن اكون حيران ممكن اكون واثق ممكن اكون ناسي .. والاساس اني احب ومشتاق احب.. واحب اللي يحب واحب كل شخص يكون محب مع محبه.. والخوف اني ما ارجع احب! .. بس انا واثق اني ححب .. ليش بدون عنوان عشان مانرتبط بفكرة مانتعلق بفكرة نص مانتعلق باي سياق بس اكون طبيعي باكتب بيكيبورد لا بتوب في نص شغل بحارب فيه بسيف ووردة .. وعلى فكرة انا مو بس في الشغل احارب بسيف ووردة انا في الحياة احارب بسيف ووردة .. وياما غلطت بسيفي بضربة وياما غلطت واعطيت وردة .. وياما صدق سيفي وياما كان الصدق في وردة … بدون عنوان وعادي نسامح ونكره وننسى ونقسى وننتقم ونحب ونصدق ونترك ونهجر ونشتم ونحضن اعز انسان .. وعادي ننخان وننجرح وننهجر ووننمكر وننجحد من اعز انسان .. هي دي الدنيا يامسكين ياطموح يامحارب بوردة وسيف ياقوي ياتعبان .. عادي نعمل من الذنوب كم! وما كان عادي نعمل من الحسنات جبال بس الاكيد انه مهما عمل الانسان راح يبقى انسان… وخلاص يعني ليه مانعذر الانسان مهما يصير منه! ونقول مسكين انسان! ليه نقسى ونحكم وما نقول حرام انسان…. ولا احنا بس نستنى نكون احسن من انسان زينا عشان ننظر عليه.. ما هو انسان وانت انسان وانا انسان .. بس الحياة غير عادلة وهذا الاكيد الا في دنيا الحيوان! .. انا وانت انسان ياحرام وهذا الواقع يانسان .. ياحرام بدون عنوان!!