سيدو و ستو

أزور ستي وسيدي كالعادة كل ما فضيت .. أدخل البيت وبعد ما سلمت على سيدي وستي قال لي سيدي تعرف تعمل تجديد استمارة عن طريق النت قلتلو ايوة ، وبس حوسة على بال ما أطلع معلومات تسجيل الدخول على أبشر .. وستي زي دايماً تقلي تبغا شاهي؟ وأقلها إيوة .. وأنا في نص شغلتي اللي امرني بيها سيدي شلت الكاب من على راسي وبانت صلعتي .. قالتلي ستي: وي متى حلقت يواد وليه حلقت؟ .. قلتلها كلها كم اسبوع ويطلع تاني .. قامت قالتلي: لو فيه خير ماطلع في القعير .. و فجأة كدا سيدي يقول: انا لو تجي القيامة مارح اتعلم على النت دا .. وستي تقول: كل زمان ولوه ادانو .. وتبدأ ستي تطقطق على سيدي وتنكِّت عليه كالعادة وأنا أبتسم عشان ماينفع أضحك على الحطَّات والإفيهات اللي على سيدي وهو جنبي معنَّها حلوة الصراحة وودي أضحك ، وطبعا سيدي مطيّز للدنيا و ولا هامو .. وفجأة كدا سيدي يفتح هرجة عن لعبة البلوت لعبة (السعوديين الأصيلة) .. ويقول تعرف العمارية هناك كانت جامعة البلوت وعميدها كان فلان الفلاني .. وبعدين يحكيني إنه راح الطايف زمان مع أصحابوا وراحوا فندق وكانوا بيلعبوا بلوت من العشا الين الصبح وواحد خويهم نسي ٤٠٠ وخويو صرخ عليه واشتكوا عليهم الغرف المجاورة بسبب الإزعاج ، وصراحة من حقو يزعق عليه فيه أحد ينسى ٤٠٠! .. وهروج كتير عن الزمن الجميل يحكوها ليا سيدي وستي .. وبعد ما خلصت معاملات سيدي في وسط ضجيج الحكاوي إللي بتنقال لي .. دعولي سيدي وستي بدعوات لطيفة من القلب .. وياسلام على سيدو وستو والكيمستري العجيب إللي بينهم ، وياحلاوة روحهم الطاهرة الحلوة إللي من الزمن الجميل.